جلساتي مع الليزر لإزالة شعر الجسم | رتوش 1

بسم الله الرحمن الرحيم 

السلامُ عليكم ورحمة الله وبركاته ..

جلسة اليُوم أول جلسة رتُوش .. 

كانت بعد الجَلسة الأساسية بأسبُوع بالضبط وكانوا كَاتبين جَلسة الرتُوش ماتزيد عن 10 دقَائق 

وإنها راح تكون للأماكن الي ما انضرب فيها الشعر .. 

بس الي حَبيته إنها  ما كانت زي ماقالو .. 

كانت زي كأنها جلسة عادية ضربت فيها كل الجسم 

* راح أتكلم أول شيء ايش صار بَعد الجَلسة الأولى : 

بدأ تطلع شَعرات صغار في كل مكان بس حَسيت نموها بطيئ .. يعني لو كانت أيام عَادية كان الشعر أطول شُوي 

منطقة الأندر آرم وأعلى الفخذ : كانت طالعه شَعرات بس كنت بمُجرد ما أسحَبها على طُول تطيح معاي عكس باقي المناطق كلها 

وكَان شُعورجَميل صراحه . لَكن هذي الحَركة مايُنصح فيها .. خَلي الشعر يطيح من نَفسه 

 حسيت بحَكه في كَتفي وبداية الظَهر لـ يومين بعدين خَفت 

الشَنب كان طالع شي خَفيييف 

الخَد جهة الأذن بدأت تطل طل شَعيرات 

البِكيني مَاجبت طَاريه لأني ماسَويته مُجرد أطرَاف مع الفَخذ 

كنت قد ما أقدر أحَاول أرطب جسمِي لأن مَعرُوف ان الجلد يزيد جفَاف مع الليزَر 

أنَا الي أعرفَه عن جَلسة الرتُوش إني ما أشيل الشعر قَبلها 

بس قالتلي أشيله قبل ما أجي ! طبعاً شلت كُل شيء إلا الوَجه والصَدر والرقبة  وجَهزت نَفسي 

  

جَلسة الرتُوش :

  حَلقت لي المُمرضة الشعر بس أحسها عَنيفه وهي تشيل صَراحه تأكدت إنه مايكون فيه شَيء

 بَعدها قسمت الجسم وبدأت تضرب الشَعر 

لاحظت إنّها زادت قوة الليزر عن المَرة الي رَاحت 

بدأت بـ أصابع الرجل والساق : الأصابع ما كان في أي إحسَاس السَاق كانت وخزَات خفيفه أقل ألم من المَرة الي راحت 

وباقي الرجل ماحسيت فيها وبعَضها كانت وخزات خفييفه جداً 

الفَخذ وجهة البِكيني : ألم بسيط .. 

اليد وَ البطن وَالظهر : نَفس الشيء .. وخزات خفيفه ومناطق بدون ألم 

الأندَر أرم : مُؤؤلم زي المَرة الي فاتت وهنا صدق أحس الليزَر يضرب من قَلب 

عَكس بَاقي المَناطق أحس ضربها خفيف وتمَشي بسرعة 

الشنَب : وخزات مُتوسطه .. 

كُله ألَم وقتي بِمُجرد ما توخر الليزرمايألم ولا شيء

- هَامش :

( الصَراحة المُمرضة ما ارتحتلها مرة صَح بَشوشة وتتكَلم عادي بس ما حَسيت شُغلها مرة !

كَلمت الأخصَائية إني أغيرهَا وقالت راح تشُوف .. 

صَح هَذي أول جَلسة بس ما أدري  بكمل معاها جلستين وأشوف , وإن شَاء الله إني مُتَفااائلة )

خَلصت الليزَر وبَعدها رحت على اللايت :

اللايت مُمرضة ثَانية وجِهاز ثَاني , 

 حَبيت مُمرضة اللايت وارتَحت لهَا أكثَر من الليزَر .. وسألتَها ماتسوي ليزَر قالت لا أنا بَس لايت 

المَرة الي فاتت بدأت بإنها تشيل لي مُوس قَبل هذي المَرة لا سَمت بالله وبَدأت ( حَبيت هالشيء فيها ♥ )

بدَأت بِـ الوَجه : جهة الإذن وكانت لسعَات خَفيفه كُل شُوي أنط ههههه وريحة حَرق الشَعر قَوية 

مرت على الوَجه كَامل وكَانت كُل شوي تسألني إذا الحَرارة كُويسة ولا قَوية 

وكَانت الحَمدلله مَقبوله وأخف ألم من المَرة الي فَاتت بَس المَنطقة الوَحيدة الي عَورتني شُوي جهة عظمَة الجَبهه 

الرَقبة : مَاحسيت مَرة شيئ بَسيط 

الصَدر : نَفس الشيء لسعَات خَفيفه ومُحتمله 

-  سألت المُمرضة إذا طَلع شَعر في هذي المَناطق أشِيله ولا لا ؟

 قَالت : لا خَلاص مَعد ينشَال مرة ثَانية لأن راح يسمَك ويصير أقوى 

شلنَاه أول مَرة عَشان الشعر كَان طويل شوي لازم يقصر عَشان ما يألمك .. 

وانتظمي في الجَلسات والمَواعيد عشان تطلَي بنتيجة كويسة 

وبَس بِكذَا خَلصت أول جَلسة رُتوش ,, 

وتقريباً أخذت سَاعة ونُص بين الليزَر واللايت 

الجَلسة الثَانية راح تُكون بَعد شَهر بِالضَبط إن شَاء الله ( بُعد الجَلسات يختَلف مِن وَحدة لـ وَحدة )